ఆరుగాలం సేద్యం
హేమంత కాలంలో ప్రారంభమై,అభినందనల వర్షంలో తడిచి,విమర్శల గ్రీష్మ తాపానికి ఎదురొడ్డి,శరత్కాల వెన్నెల్లో వీక్షకులకి విందు చేసి,ఆకురాలే శిశిరం నుండి,సరికొత్త ఆలోచనల వసంతాన్ని విరబూయిస్తూ సాగిస్తున్న ఈ సేద్యానికి ఆరువసంతాలు.ఈ ఆరు సంవత్సరాల్లో ఈ క్షేత్రంలో పండించిన పంటలు ఎన్నో.
2010 జనవరి 14 నుండి నేటి వరకు ఆరు సంవత్సరాల పాటు గ్రామాభివృద్దిలో, గ్రామ వారసత్వ సంపదని పరిరక్షించి వాటి విశేషాలని భావితరాలకి అందించటంలో సఫలీక్రుతులమయ్యాం అని తెలియచేయటానికి సంతోషిస్తున్నాము. పలు అభివృద్ధి పనులకి, అలాగే గ్రామంలో అవసరాలని ఈ మాధ్యమం ద్వారా తెలియచెయ్యగా చాలామంది ప్రవాసీయులు స్పందించి తమ వితరణని అందించారు.ఎప్పటికప్పుడు గ్రామంలో జరిగే విశేషాలని, వార్తలని ఈ వెబ్సైట్ ద్వారా తక్షణమే అందరికీ చేరేట్లు చేస్తున్నాం. గ్రామం నుండి 100 ఏళ్ల క్రితం విదేశాలకి తరలిపోయిన శిల్పసంపదని ఈ మాధ్యమం ద్వారానే మళ్ళీ అందరికీ చూపించగలిగాము. కాల గర్భంలో కలిసిపోయిన మన గ్రామ విశిష్టతని తెలియచేసే ఎన్నో విలువైన పుస్తకాలని ఈ బుక్స్ రూపంలో భద్రపరిచాం. ఘంటసాల చరిత్ర పుస్తకాన్ని మళ్ళీ పునర్ముద్రించి చరిత్ర పరిశోధకులకు ఒక దిక్సూచిగా ఉపయోగపడేట్లు చెయ్యగలిగాం. రాష్ట్రం విడిపోయాక ప్రభుత్వం చేపట్టిన బుద్ధ ఆరామాల అభివృద్ధి ప్రాజెక్ట్ లో మన ఘంటసాల.net కూడా తన వంతు సమాచారాన్ని అందించింది. జలధీశ్వరాలయ అభివృద్దిలో , ఆ ఆలయానికి మరింత ప్రాచుర్యం కల్పించటంలో వెబ్సైటు పాత్ర ఎన్నదగినది. ఇటీవల భారత ప్రభుత్వం చేపట్టిన స్వచ్ఛ భారత్ కి మద్దతుగా స్వచ్ఛ ఘంటసాల కార్యక్రమానికి ఆర్ధికంగా. నైతికంగా మద్దతు తెలియచేసి కార్యక్రమ విజయానికి దోహదపడటం జరిగినది.
మేము ఈ వెబ్సైట్ ని ప్రారంభించినపుడు అందరం అప్పుడప్పుడే ఉద్యోగాల్లో స్థిరపడుతున్నాం. చాలామంది ఈ వయసులో ఇవన్ని ఎందుకు అని వారించినా, కేవలం మా సమయాన్ని, ఆలోచనల్ని మాత్రమే పెట్టుబడిగా పెట్టి ఈ వెబ్ సైట్ ప్రారంభించాం.ఆర్ధికంగా పెట్టుబడి ప్రవాస ఘంటసాల వాసులే అందించారు.గడచిన సంవత్సరం నుండి గ్రామంలో నివసించే పెద్దలకి కూడా ఈ మాధ్యమం బాగా దగ్గరైనది. ప్రతి రోజూ వారు కూడా ఇంటర్నెట్ చూస్తూ మమ్మల్ని మరింత ప్రోత్సహిస్తున్నారు.కొన్ని విశేషాలని,వార్తలని నేరుగా వారే అందిస్తున్నారు.ఈ వెబ్సైట్ లో విన్నపాలని చూసి కొంతమంది దాతలు నేరుగా తమ వితరణని అందిస్తుండగా కొంతమంది దాతలు మాత్రం మనఘంటసాల టీమ్ వారి వ్యక్తిగత బాంక్ అకౌంట్ కి పంపించటం జరుగుతోంది. ఆ తరువాత మనఘంటసాల టీమ్ ఆయా సంస్థలకి, వ్యక్తులకి ఆ డబ్బుని అందించటం జరుగుతోంది.ఇలా ఆరు సంవత్సరాల్లో మేము అందించిన సేవలకి సరైన నివేదిక అంటూ లేకుండా పోయింది. అందుకే ఈ మనఘంటసాల.net సేవలని మరింత విస్తృతంగా చెయ్యాలనే ఉద్దేశంతో , గ్రామస్తుల సూచన మేరకు మన ఘంటసాల ట్రస్ట్ గా మార్చి ఎన్ జి ఓ గా రిజిస్ట్రేషన్ చెయ్యాలని భావించాము.