రవితేజ నారాయణ తో మనఘంటసాల ఎడిటర్ రాజేష్ వేమూరి ప్రత్యేక ఇంటర్వ్యూ తరువాయి భాగం
రాజేష్ వేమూరి : మీకు సేవాభావం కూడా ఎక్కువే అని విన్నా
అవును, కాని అవన్నీ నేను చెప్పను.
నేను చేసిన వ్యక్తిగత సహాయాల గురించి చెప్పను కాని, కొన్ని ధార్మిక సంస్థలకి మాత్రం నా వంతు సాయం చేస్తూనే ఉంటాను. ప్రతి వారం హేల్లెన్ కెల్లర్ అంధుల బడిలో భోజనాలు పెడతాను. కొన్నిసార్లు వాళ్ళతోనే కూర్చుని భోజనం చెయ్యటం ఇష్టం. క్రిస్మస్, కొత్త సంవత్సరం వేడుకలు మాత్రం నా దగ్గర పనిచేసే వాళ్ళతో చేసుకుంటాను. ఆ రోజు రాత్రి రోడ్డు పక్కన పడుకునే వాళ్ళని లేపి బిర్యానీలు ఇస్తాను. నాకు స్నేహితులు కూడా ఎక్కువే, ఘంటసాలలో ఉన్న నా మిత్రులతో స్నేహం ఇప్పటికీ అలాగే కొనసాగుతోంది. ఎవరైనా నా దగ్గరికి వచ్చి సహాయం కోరితే నేనెప్పుడూ కాదనలేదు. నా దగ్గర పని చేసేవాడు అంటే నా కుటుంబంలో ఒకరు అనే అనుకుంటా. ఘంటసాలలో వంపుగాని ఆదిశేషు అని మా నాన్న దగ్గర పనిచేసేవాడు.ఆ ఆదిశేషు వాళ్ళ నాన్న మా తాత దగ్గర పనిచేసేవాడు. ఇప్పుడు ఆ ఆదిశేషు వాళ్ళ అబ్బాయి నా దగ్గర ఉన్నాడు.వాళ్ళకి ఏ అవసరం వచ్చినా నేనే చూసుకుంటా అని చెప్పా.ఒక వేళ ఆదిశేషు చనిపోయినా నేను రాకుండా తీసేకెళ్ళటానికి వీల్లేదు అని చెప్పా. నాకు కులం మతం అనే పట్టింపులేవి లేవు. నన్ను నమ్ముకున్న వాళ్ళకోసం ఏదైనా చేసే మనస్తత్వం నాది.